Plantun de Prouvènço

Pèr coumpara dos planto d'encò nostre

Puccinellia festuciformis & Panicum barbipulvinatum

Puccinellia festuciformis

Poaceae Graminaceae

Nom en français : Glycérie.

Descripcioun :
La glicerìo, Puccinellia festuciformis, trachis dins la sansouiro e àutri relarg sala. Fai un pau pensa à uno petugo emé sis espigueto de de 5 à 10 mm (mai eici li lemma soun membranouso e gaire pounchudo). D'efèt, fai de grand brout acoulouri de vióulet (glumo e lemma roso-vióuleto e bourdado de blanc). La fueio d'en aut èi proun longo e enguèno la baso de l'enflourejado ; aquelo fai de 10 à 30 cm. La subsp. presentado eici, ié dison festuciformis (glumo d'en bas > 2,2 mm e d'en aut >3 mm emé d'antèro longo - > 1,7 mm).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 40 à 60 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Puccinellia
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 10 à 30 cm
Flourido : Printèms - Estiéu

Sòu : NaCl
Autour basso e auto : Pancaro entresigna
Aparado : Noun
Mai à avoust

Liò : Sansouiro - Palun
Estànci : Mesoumediterran
Couroulougi : Estenoumediterrano
Ref. sc. : Puccinellia festuciformis (Host) Parl., 1850

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.